Məcburi köçkünlər üçün özünüməşğulluq imkanları

Beynəlxalq Miqrasiya Təşkilatının (BMqT) Azərbaycan nümayəndəliyi məcburi köçkün ailələrinə bazar qiymətləndirmələri, təlimlər və qrantlar daxil olmaqla, mikro və kiçik sahibkarlıq müəssisələrinin yaradılmasına dəstək verməklə özünüməş­ğulluq imkanları yaratmaq istiqamətində təşəbbüslərini davam etdirir.

BMqT-nin Azərbaycan nümayəndəliyindən bildiriblər ki, təşkilat Koreya Beynəlxalq Əməkdaşlıq Agentliyinin (KOICA) maliyyə dəstəyi ilə həyata keçirilən “Azərbaycanda kəhriz su sistemlərinin bərpası vasitəsilə məcburi köçkünlərin məskunlaşdığı ərazilərdə kənd yerlərinin kompleks inkişafı” layihəsinin kiçik biznesə dəstək komponenti çərçivəsində biznes təlimlərinin davamı olaraq biznes planları uğurlu hesab edilən iştirakçılara qeyri-nağd qrantlar verilməsini reallaşdırır. Ağdam rayonunun Bənövşələr qəsəbəsində və Baharlı kəndində yaşayan iki nəfər məcburi köçkünün dərzilik biznesinə göstərilən dəstəkdən sonra rayonun Bənövşələr qəsəbəsinin və Aşağı Yüzbaşılı kəndinin, həmçinin Ağcabədi rayonunun Kəhrizli, Hacılar, Sarıcalı və Hüsülü kəndlərinin sakinləri olan məcburi köçkünlərdən 14 nəfərə 28 baş inək və 2 nəfərə səkkiz baş buzov paylanılıb.

Növbəti mərhələdə gözəllik salonlarını açmaq istəyən və ya artıq kiçik biznes şəklində fəaliyyət göstərən 5 benefisiar lazımi avadanlıq və ləvazimatlarla təmin olunacaqlar.

Ümumilikdə, pilot rayonlar olan Ağdam və Ağcabədi rayonlarında keçirilən biznes təlimlərində iştirak edən 61 iştirakçıdan Ağdam rayonunda yaşayan 23 nəfər, Ağcabədi rayonundan isə 14 nəfər məcburi köçkünün biznes planları dəstəklənmək üçün seçilib.

Qeyd edək ki, layihənin biznesin inkişafı komponenti çərçivəsində hədəf ərazilərində məcburi köçkün icmalarına yönəlmiş fəaliyyətlər üç hissədən ibarətdir: fərdi təşəbbüslərin inkişafı üçün etibarlı məlumat bazasının yaradılması; məcburi köçkün icmalarının maliyyə savadlılığının artırılması və özünüməşğulluğun təşviqi.

Bu fəaliyyətlər, həmçinin məcburi köçkünlərin həyat səviyyələrini yaxşılaşdırmağa və onların cəmiyyətin həyatındakı iştiraklarını təşviq etməyə dəstək vermək məqsədi daşıyır.

Layihənin ümumi məqsədi Azərbaycanda kənd təsərrüfatı icmalarının enerjisiz su təchizatını təmin etməklə, məhsuldarlığı və yaşayış imkanlarını artırmaqla məcburi iqtisadi miqrasiyanın qarşısının alınmasına töhfə verməkdir.